في حاجات بالاقيها في المدونات الصراحة كده بتخنقني
علشان كده دي نصيحة لكل صاحب مدونة انه يحاول تجنب الاشياء دي في مدونته
اولا اللي بيخلي التعليقات في صفحة جديدة مستقلة, حاجة ملهاش لازمة خالص بتكتر عدد الصفحات اللي انا فاتحها علي الفاضي وبتبقي تقيلة جدا جدا وبتجبرني اقفل المدونة الاصل دون قراءة باقي الموضوعات
ثانيا البني ادم اللي بيخلي التعليقات
Comment moderation has been enabled. All comments must be approved by the blog author.
بصراحة حاجة تخنق لأن انا بحب اقرأ تعليقي بعد ما يتنشر وخاصة علشان اتأكد انه مفيهوش اخطاء املائية , واذا كان عامل رقابه في مدونته ويسمح للتعليقات اللي علي مزاجه بس فده يروح يتنيل احسن
ثالثا ودي بجد بتخنق اهلي , البني ادم اللي بيحط كلمة تأكيد
Word Verification
اهو ده بقي تعريف البني ادم الخنيق حرفيا , لأنها ملهاش اي لازمة في الحياة وببتضيع وقت ويا سلام بقي بعد ما انقلها بخطها المعفن ترجع تقولي غلط , بقفل المدونة علطول واقول انشالله ما علقت
رابعا واخر حاجة حاليا هي المدونات اللي بتحتاج كتابة عريضة تعريفات قبل التعليق زي الاسم والايميل وعنوان المدونة بيحسسني اني داخل الحرب وبتبقي ممله ورخمه
دي بعض الحاجات اللي بتضايقني في بعض المدونات خاصة اثناء التعليق , وانا كنت ناوي اكتب الموضوع ده واحط بعض الامثلة للمدونين في كل نقطة لكن قلت الطيب احسن وكل واحد عارف نفسه واللي في مدونته بطحة يحس بيها
أول واحدة حلوة انك بتقرا الموضوع بعيجا عن التعليقات... بالعكس دي حلوة جدا.... الاتنين التانيين دول رزلين بجد
ReplyDeleteانت كده جيبت الخلاصة
ReplyDeleteهو ده التساؤل اللى كان محير كتير مننا
ليه موضوع كلمة التأكيد والحاجات العقيمة اللى بتخنق الواحد
من ناحية تانية ليه حذف بعض التعليقات وعمل الفلترة للكلام اللى مايعجبش
لازم يكون فيه تقبل للرأي والرأي الاخر
انا متفق معاك جدا جدا
لكن نقطة التعليقات ووضعها فى صفحة تانية فالموضوع ده يرجع لصاحب المدونة
يارب حبايبنا البلوجرز ينتبهوا لمثل هذه النقاط التى قد تجلب الملل والضيق
وشكرا يا دكترة
لفت انتباهى انك عملت بوست مخصوص للتعليق على الحكاية دى
ReplyDeleteوالظاهر انها بتزعج فعلا
لكن يمكن علشان انا صبورة شوية باستحمل
ولما باحب اكتب تعليق بافضل وراه لما يتكتب
تسعين فى المية باكافح وباحاول
رغم انك مش بتعلق عندى
بس عايزة اقوللك ان مسألة الصفحة التانية بتبقى نتيجة للتامبلت الجديدة اللى اختارها المدون من موقع اخر غير بلوجر، انا عملت كدة وفوجئت ان التصميم مصمم على كدة
:)
يعنى غالبا مش ممكن تتلغى
الا فى حالة لو كانت من تامبلت بلوجر والمدون بنفسه قال ان التعليق يبقى مش فى بوب اب ويندو
طول بااااالك
خلى نفسك طويل
شكلك دايل اب او زى حالاتى مشترك فى وصلة مع سبعميت بنى آدم
انت افتح الصفحة واخرج وتعالى فى السهرة علّق
عاااادى جدا
ReplyDeleteالحمد لله ماعنديش ولا حاجة من الاعراض دي في مدونتي
في حاجات فعلا بتحس انك داخل تحقيق مش تعليق
تشكرات على التنبيه يا فندم
:)
تحياتي من غزة
كنت متوقع اني أجي أعلق الاقيك عامل حاجه من الحاجات الخنيقة دي :)
ReplyDeleteبس بوست لذيذ والله فكرني باللي خلقه ضيق راح يفصل بدلة عند الترزي قاله انا عايزك تعملهالي صفين مش صف واحد ونيلة وبلا ازرق وبعدين الزراير عايزها من القماش مش النحاس والزفت اللي بيلمع ده .. أقولك والله مانت عامل حاجه ... هاااااااات
أنا ينطبق على ثانياً ورايح اتنيل
ReplyDeleteعاوز بس اقلك انى عامل الحكايه لسبب أخر غير اللى انت ذكرته الا وهو منع التعليقات الخارجه عن حدود الليقاه والأدب اى شئ غير كده بنشره وهنشره وتعالى عندى شوف التعليقات اللى بتهاجمنى جنب اللى بتشجعنى انما قلة ادب لا والف لا
دكترة
ReplyDeleteقلبك ابيض يا دكتور الطيب احسن
يعنى فى كتير مدونين لكن مش محترفين يا دكتور لسه هواة
هى بصراحة كمان بتغظنى انا كمان
اه والله
تحياتى
بص بقي
ReplyDeleteانا عن نفسي
بعد ماقريت البوست بتاعك غيرت حكايه التعليق في بوكس
اما حكايه تحويل التعليق دي
موش حا اقدر اوعدك بتغيرها
ليه لأني باعاني من بعض القراء اللي مابيقروش صح ولا بيفهموش صح
فالشتائم التي تنهال
كثيره وكبيره ومن العيار الثقيل لذلك امرر التعليقات التي تنتقدني او حتي تسبني بشتائم من الممكن نشرها اما الشتائم المتداوله في الشوارع لايمكن ان انشرها في مدونتي
تحياتي لك
وتعالي اقرا وعلق ومعلش بقي سماح انت عرفت قصدي
عندك حق في كل كلمه قلتها
ReplyDeleteأنا كمان بتفقع جدا من الحاجات دي
انا مكنتش اعرف ان الموضوع هيلاقي الاستجابه دي كلها
ReplyDeleteوالحمد لله اتفق معظم الناس معايا
باستثناء موضوع التعليق في صفحة جديدة
انا زجهة نظري انه بيتقل النت جدا
خاصة لاصحاب الدايل اب زي حالاتي
حلم
ReplyDeleteصحيح انا نادرا ما علقت عندك
لكني عارفك جدا وباحترمك جدا من تعليقاتك عند باقي المدونيين واعرف انك صاحبة قلم جيد وموهبة كبيرة خاصة في النقد الادبي ولا انسي تعليقاتك علي قصص احمد شقير
فلك تحياتي
انا عاملة حكاية النافدة المستقلة دي لكن مكنتش افنكر انها بتزعج حد
ReplyDeleteانا اللي بيزعجني حقيقي الموسيقى اللي بيحطوها تيجي على الموسيقى اللي انا بكون بسمعها و تلخبط الدنيا عشان كده بقيت اقفل المايك وانا داخلة على مدونة
تحياتي
i support dah bkol ma amlok men kowaaaaaaaaaaaaaa
ReplyDeleteههههههه معلش يا دكاترة بس اصل ليها اصل
ReplyDeleteانا شخصيا واحد سافل يبعتلي تعليقات ابيحة و لازم امسحها اول باول و صدقني انا بنشر التعليقات اول باول
فعملية فلترة التعليقات دي مش ارننة بس شر لابد منه
يا سيدي اي خطأ املائي مقبول منك
تحياتي