Thursday, January 25, 2007

لا فض الله فوهك ايها اللواء .... واتضح ان المجرم اخواني


في برنامج 90 دقيقة النهاردة اتهم اللواء محمد عبدالفتاح عمر , وكيل لجنة الدفاع والامن القومي اتهم مجرم المعادي الذي لم يقبض عليه او حتي تحدد شخصيته حتي الان انه اخواني وان الاخوان المسلمون هما اللي مدبرين الموضوع ده قال ليه علشان يلهو الامن ويشغلوه
لا فض الله فوهك ايها اللواء ايه النباهة والعبقرية دي
احنا اتعودنا دايما ان المجرم مجنون مختل عقليا اهبل حتي الصحافة الحكومية حفظت استامبة وزارة الداخلية وقالت انه مختل نفسيا حتي قبل ما الوزارة تقول
اما موضوع انه اخواني فدي جديدة خالص ويظهر ان ده تأثير الفكر الجديد فطبعا ومن غير ما اعرف اللواء اكيد حزب وطني والا ماكنش مسك وكيل اللجنة المذكورة , طبعا كلامك لا يعقله عيل صغير بشخة ايها اللواء وواضح ان فكرتك عن الشعب المصري توقفت عند حدود النجوم اللي كانت علي اكتافك
انا لن ادافع عن الاخوان ليس لان الكثير منهم علي اعلي مستوي من الثقافة والتعليم والكثير منهم اساتذة جامعات واطباء ومهندسين ووو... ولكن لأنهم اصلا مش متهمين خاصة في الموضوع ه ده ولكن اللي نستخلصة من تصريحات اللواء الاتي
اولا الحملة الشرسة ضد الاخوان مستمرة رحاها ولم تكتفي الحكومة والحزب الحاكم بلعن سلسفين ابوهم يوميا في برامج يطلقوا عليها الحرية وعدم وجود خطوط حمراء وهي في الاساس كلها خطوط حمراء ويكفي عدم وجود طرف اخواني في جميعا للرد وهذا ابسط حقوق الحوار
ثانيا اننا وصلنا لمرحلة قلب ترابيزة الاتهامات علي الاخوان فالحكومة شايفه انه كل لما تطلع مصيبة او قضية فساد كبري يكون واقف وراها عضو من الحزب الوطني زي غرق العبارة واكياس الدم الفاسدة وغيرها الكثير , فرأت ان تسبق و تتهم الاخوان وخاصة في قضية هلامية وغير معروف الفاعل فيها , واعتقد انه بعد هذا الاتهام لن يظهر ابدا حتي تظل التهمة لابسة الاخوان
ثالثا يا سيادة اللواء روح داري علي خيبة وزارة الداخلية وعدم قبضها علي المتهم بحجة اخري مش الحجة العبيطة دي امسكوا المتهم الاول بعدين اخونوه وفدوه ناصروه حتي , لكن كده ..... شكلك بقي وحش قوي
رابعا هو البرئ اصبح متهم حتي لو لم تثبت ادانته ولا ايه يا سيادة اللواء
خامسا يا سيادة اللواء ده مجرم اقبض عليه وحاكمه حسب القانون , لكن موضوع تصنيفه ده غريب قوي يعني لو طلع فعلا اخواني هل العقوبة هتختلف عن لو كان وطني ولا وفد ولا تجمع , في اي شرع هذا وهل كل المتهمين يتم تصنيفهم قبل محاكمتهم ولا ايه , اما صحيح شئ ورأي عجيب جدا من رجل شرطة
سادسا العيب مش عليك انت ايها اللواء فانت بتنفذ تعليمات اللي فوق او حتي بترضيهم وخلاص لكن العيب علي اللي اداك صوته ونجحك في الانتخابات وخلاك عضو مجلس شعب وانت علي هذه الدرجة من التفكير , او حتي علي الاقل من التفكير بأن المصريين اغبياء قوي علشان يصدقوا الكلام ده
يا سيادة اللواء اتكلم في اللي بتفهم فيه احسن ويا الف حسرة وندامة علي الامن القومي والدفاع طول ما فيه ناس ده تفكيرهم

Saturday, January 13, 2007

قصص حب حقيقه فاشله بعضها مفعم بالمشاعر والبعض الاخر برضه مفعم....... سلسله جديده


nothing like this قرأت اليوم بوست في المدونه الجميله
بعنوان سبب لوقوعك في الحب من غير سبب, عجبتني جدا يمكن لأنها حقيقيه جدا وبتحصل معايا بمنتهي الدقه , ودفعتني وشجعتني علي كتابه سلسله قصص حبي الفاشله اللي تردت كثيرا في كتابتها لكن امرنا لله , واولا عايزكم تعرفوا اني هكتب بمنتهي الصدق والدقة وهبدأ بالتسلسل الزمني من اول قصه حتي الان
مقدمه طبيعيه
اولا انا شخص ملتزم , مش قوي يعني , ممكن تقول شبه ملتزم حاجة زي شبه المنحرف في الهندسه كده وان اي واحده بابدأ أكلمها واحاول ادخل معاها في علاقه فان نتيتي صافيه وبجد اتمني الارتباط بها وليست للتسليه او تقضيه الوقت
ثانيا انا زوقي في البنات صعب جدا , ومبتعجبنيش غير البنت البرفكت الجامده فعلا اللي جمالها يخلي الاعمي يفتح والاخرس يغني علشان كده قصص حبي .... مش عارف ممكن معقده شويه
ثالثا انا هاكتب القصص اللي تمنيت فعلا اني اكمل حياتي مع بطلتها فقط ولن اكتب عن العلاقات الخطافي الطايره لاني لا احب الاستمرار في علاقه لا اتمني لها النهايه الطبيعه
قصه حب فاشله رقم واحد
انا كنت طول عمري مليش في موضوع العلاقات ده حتي في عز فتره المراهقه مفيش مانع اني اعجب بواحده غالبا من نفس الفصل وغالبا بتتغير كل سنه مع تغير الفصول , لكن عمري ما كلمت واحده عن حب او ارتباط او خلافه لدرجه اني اتخانقت قبل كده مع بنتين مره وانا في تالته اعدادي ومره وانا في تانيه ثانوي لانهم كانوا بيحاولوا يقربوا مني جدا وده مش لأني واد تقيل لكن لأني مكانش في دماغي من ناحية وهم مكانوش مطابقين للمواصفات من ناحية اخري
اما عن اول قصة حب تمنيت انها تكمل للنهايه كانت وانا في سنه تانية في الكليه لما اتعرفت عليها كانت ملاك يسير علي الارض في منتهي الرقة والجمال , هي مكانتش معايا في الكليه هي كانت في كلية اداب وفي جامعة تانيه وساكنة في محافظة تانية كمان امها كانت لبنانية وابوها مصري وده يمكن يوضحلكم منتهي الجمال اللي كانت عليه , عشنا مع بعض فترة جميلة للغاية بس للأسف كانت فترة قصيرة جدا حوالي تلات اربع شهور بس لغاية ماحصل الموقف النهائي واللي بسببه انتهت العلاقة
كان بقالي فترة مشفتهاش وطلبت كذا مره منها اني اشوفها لكنها كانت بترفض وتتحجج بحجج واهية وميصدقهاش عيل لغاية ما فيوم قالتلي ان في فرح لواحدة قريبتهم واني ممكن اجي واشوفها في الفرح كان في محافظتها, وفي يوم الفرح رحت غسلت الحتة اللي الحبل وكويت الحتة اللي الحبل وبعدين لبست الحبل معلش قصدي لبست الحتة اللي الحبل ورحت لابس اشيك ساعة عندي وحاطت من اغلي برفام ورحت مطلع اقدم قزازة براندي عندي واللي تاريخا يرجع ل 1901 ورحت واخد منها رشفة ورجعتها الخن تاني , وبعدين نزلت نقيت افخم عربية عندي , علي اعتبار اني عندي كذا واحدة يعني ما انا مش هاقولكم اني نزلت اتبهدلت في المواصلات والهدوم اتكرمشت والبرفام تحول لريحة بنزين وهباب ما علينا , وصلت مكان الفرح وقلبي بيدق خلاص هشوفها بعد فترة وبعد ما وحشتني جدا وفضلت مستني اترقب الوجوه هي دي لأمش دي هي دي لأ مش دي وفضلت مستني مستني مستني لغاية لما قارب الفرح علي الأنتهاء قولت اتصل بيها واتصلت اتصلت اتصلت ملقيتش حد بيرد طبعا اتضايقت جدا ورجعت قفايا يقمر عيش وبعدين فوت يوم والتاني لعلها تتصل تعتذر او تقول اي حاجة ولكن لا حس ولا خبر, رحت متصل بيها لسه بقول الو لقيتها بترد ببهجة وفرح وحنية قلت في سري هي هتعمل دور العبيطة ولا ايه؟ رحت متدهاش فرصة وقعدت اديها علي دماغها لغاية ما طلعت شعلة الغضب اللي جوايا ورحت قافل السكة ومن ساعتها لا كلمتها ولا اعرف حاجة عنها
ولكني لحد الان ندمان اني مسمعتش منها ومسبتلهاش فرصة تدافع عن نفسها ,وكتير بفكر اتصل اعرف اخبارها علي الاقل لكن كرامتي بتنقح عليا

Monday, January 08, 2007

نيههاهاهاهاها ... الاسماعيلي يدق عنق الاهلي ويفوز عليه في قلب العاصمه بالثلاثه








يا اسماعيليه يا اسماعيليه
احب ازورك المغربيه
واركب فلوكه انا وحبيبي
ونغني غنوه علي السمسميه
اه ياللي ... يا عيني ياللي

لن اتكلم عن فنيات المباراة لأني اعلم وكما قلت سابقا ان الرياضه هي اخر ما يهتم به معظم المدونون
ولكن عندي سؤال؟ لماذا لا يحقق الاسماعيلي نتائج جيدة امام الاهلي الا في ظل وجود حكام اجانب , وقد كتبت العام الماضي عن مدي الظلم البين الذي تعرض له الاسماعيلي امام الاهلي والزمالك وهو الظلم الذي اعترف به القاصي والداني
الا ترون انه امتداد لحالة الظلم والفساد التي تعيشها البلد في كل مجالاتها السياسيه والاقتصادية والرياضيه والخ الخ
الا يمثل ظلم فريق مجتهد وفساد اداري تحكيمي عينة من ظلم وفساد يمارس ضد جميع المصريين فانا أري ان الاهلي هو الامتداد الطبيعي للحزب الوطني في مجال الرياضه وهو الامتداد الطبيعي للظلم والاحتكار واستغلال النفوذ
وحتي لا اتهم اني اخلط الرياضه بالسياسه ويطلعلي واحد يقولي انت رضواني علي وزن من يخلط الدين بالسياسه والناس تنتقده و تسميه اخواني , انتظر موضوعي القادم لتعلم مدي تغلل السياسه في مجالات حياتنا ومدي تغلل كل مجالات حياتنا في السياسه
ولكن الان اهني نفسي والف مبروووووووك للاسماعيلي

تحديث

ما حقيقة ان عصام الحضري كان واخد معاه بطيخة علشان يطلع بها فوق العرضه بعد المباراة وهو طالع بها من الملعب ، كان بيزعق مع النحاس ،وقعت منه انكسرت ...... طلع في قلبها 3 مانجات

Monday, January 01, 2007

عيد بأي حال اتيت يا عيد .......الي متي نتحمل الاهانه




سنه 2006 دي سنه كئيبه من اول يوم لأخر يوم
وطبعا مجاراة لحالة الكأبه التي بتمر بيها السنه كان لازم اخر بوست ليا يكون مهين مذل زيها
فبالأمس واثناء نحر جميع المسلمين لأضحيتهم افقنا بأهانه اخري لنا كلنا كمسلمين فهاهو سيد الارض بوش يصفع جميع المسلمين بالقلم علي وجهوهم ويقول لهم ايها المسلمون ايها العرب المتوحشون الهمجيون الارهابيون فكما تقومون بكل الوحشيه بذبح اضحيتكم فانا سبقتكم بدقائق قليله بنحر رئيس منكم ولكم واعدمت صدام حسين وقطعت رقبته كما تفعلون بالضحيه وهذه هي النهايه التي سيلقاها كل من يقول منكم لا
لتكون هذه هي الاهانه الثالثه والصفعة الثالثه علي وجهونا بعد الرساله التي كتبها اطفال اسرائيل علي صواريخهم قبل ان تدك رؤؤس اطفال لبنان وبعد الاهانه السابقة في بدايه الغزو الامريكي للعراق عندما كتب جندي امريكي علي صاروخ لهم هذه هديه رمضانم لكم
اي ان الاهانه الاولي كانت في رمضان والثالثة في عيد الاضحي المبارك
بمنتهي الاستفزاز والاهانه للمسلمين وبشعائرهم ودينهم
فبعد اعدام صدام حسين وما قبلها من اهانات هل نفيق مره واحده هل نقاوم مره واحده هل نقول لا مره واحده
ام اننا سنظل ننتقد حسن نصرالله وننتقد ايران واحمدي نجاد وننتقد حماس
فهل نخلي عند اهلنا شويه دم مره وعلي الاقل مننتقدهمش بس مننتقدهمش مش هاقول نشجعهم ولا حتي ندعمهم
في ظل احوالنا وحكامنا وافكارنا والسوس اللي بينخر فينا حاليا .....اشك

قبل ماانسي ..... اخبار طلاب الازهر المحبوسين ايه ..... متهألي دلوقتي المفروض نفرج عنهم وندربهم اكتر ونزود عددهم علشان نلاقي حد مستعد للمقاومه .... قبل ما نصحي في يوم ونلاقي ريسنا يذبح كما تذبح الخراف وكما ذبح من قبله ..... فهل نتعلم الدرس