Monday, February 23, 2009

ظهور نتيجة التكليف .... شرم الشيخ مرحبا


ظهرت بالأمس نتيجة تكليف الاطباء دفعة ديسمبر 2007 واللي هيتكلفوا في اول مارس 2009

وانا طبعا منهم

النتيجة تعتبر كارثية لأغلب الناس اللي اعرفهم

تقريبا انا واصحابي غطينا معظم انحاء الجمهورية

انا جالي تكليفي في شرم الشيخ

الحمد لله احسن من ناس تانية كتير علي الاقل انا كنت كاتبها الرغبة الرابعة

وبغض النظر عن اني اشتغلت هناك قبل كده


انا مش زعلان بس كمان مش فرحان قوي بشرم الشيخ

صحيح انا اشتغلت هناك وعندي خبره بيها وخلال السنة اللي فاتت (سنة الامتياز) فكرت كذا مرة بل كمان سعيت اني ارجع اشتغل هناك تاني , لكن دلوقتي الوضع اختلف

اولا انا من ساعة ما خلصت امتحانات في نوفمبر 2007 وانا بره البيت

اشتغلت شهرين في الغردقة وشهرين في شرم الشيخ

وبعدين قضيت ستة شهور امتياز في القاهرة

يدوبك ريحت شهر رمضان في البيت (الاسماعيلية) وبعدين بدأت كورس

medical transcription.

في القاهرة تاني لمده اربهة شهور

وبرضه اثناء الكورس قدمت وباستعد وربنا يوفقني وبدعواتكم لأمتحان الملحقيين الدبلوماسيين في وزارة الخارجية

يعني عندي من اول مارس التكليف في شرم الشيخ , والكورس في القاهرة , وامتحان وزارة الخارجية في نص تلاتة

ومكلمني دكتور جاري علشان اشاركه العيادة معاه اشيل نص الاسبوع وهو النص التاني

ده كله غير ان انا زهقت من الغربة والسفر وكنت ناوي اقضي السنة اللي قبل الجيش دي( تكليفي يعني) في مكان قريب من البيت

لكن الحمد لله علي كل شئ

شرم حلوة برضه واحسن من ناس اصحابي كتير

اللي راح بير العبد , ابوذنيمة , الطور , اسوان , رفح , سفاجا , نخل وغيرها كتيييييير





شكلها باظت

انظر حولك

د. خالد عزب

Sunday, February 22, 2009

نهنئ انفسنا علي خروج ايمن نور

نهنئ انفسنا علي خروج ايمن نور

نهنئ اسرته وعائلته علي عودته مجددا للحياة

ونتمني ان يغفر لنا تقصيرنا معه وجعله وحيدا يتحمل عقاب مطالبتنا بالتغيير

نهنئ انفسنا قبل ان نهنئه علي خروجه

ونتمني عوده قويه لنا ولمصر ان شاء الله

الف حمدالله علي السلامه

Sunday, February 08, 2009

لنحرق هذا الوطن


ونظرا لان بلدنا بلد سلبى تجاه ما يحدث لاخواننا فى فلسطين

ونظرا لاننا جميعا بلا استثناء فاسدون مغرضون بيننا من وافق ومن احب ومن قبل ومن عشق الانحلال والفساد والانحطاط ان صح التعبير

ونظرا لاننا فرطنا فى ديننا وفى عروبتنا وفى تاريخنا وفى نضال من سبقونا

ونظرا لاننا تاجرنا بتراث اجدادنا وبعنا ما طالته ايدينا من جدهم وجهدهم

ونظرا لاننا جميعا من الذكور نحاول باستماته ان نهرب من التجنيد فى الجيش لانه ليس اكثر من تضييع وقت ومذله واهانه بغير داعى

ونظرا لانه لا يوجد فينا من يستطيع ان يقدم لنفسه سبب واحد لكى يحب او يحترم هذا الوطن

ونظرا لان رئيسنا كما يؤاه الغالبيه العظمى من الناس رجل فاسد باع وقبض وشرع فى تنصيب ابنه من بعده

ونظرا لان ابنه من وجهة نظر اغلبنا شاب متنمر محاط بالفاسدين الشباب بعد ان شرع فى التخلص من الفاسدين العجائز من رجال ابيه

ونظرا لان شيوخنا فى الازهر يتلقون التعليمات كى يصدروا الفتاوى

ونظرا لان جنودنا فى الجيش وضباطنا تافهون ومستهترون ولا يستطيعون حمل السلاح سوى فى التشريفات والاحتفالات

ونظرا لان مياهنا ملوثه وطعامنا مهجن ومسرطن وهواءنا مسمم ومستقبلنا اسود كقلب الليل وخيبتنا قويه ولا الفيلق الثالث النازى

ونظرا لان رجالنا عاجزون مكرهون ونساءنا غاضبون متذمرون وشبابنا تافه فارغ العقل وبناتنا فى وادى غير الوادى والجميع من الشباب البنات عاطلون مغيبون

ونظرا لاننا فقدنا كرامتنا امام العرب والمسلمين واتهمنا بالاغراض والعماله واصبح الحمار والقواد والعميل واصحاب الشوارب والكروش يتهمنوننا بالعماله ويزايدون علينا ليل نهار

ونظرا لان شوارعنا مزدحمه وكبارينا واقفه عطلانه وانفاقنا تجمعات مياه مجارى وتجارنا جشعون مستغلون وكتابنا منافقون وصوليين
ونظرا لان الجميع او اقل قليلا يتفق معى فيما اقول


فهيا معى يا اخى ويا اختى لكى نفعل شيئا نافعا وبناء على هذا الوضع فاننى اقترح ان نفعل ما هو حرى بنا فعله فى مثل هذه المواقف لنقوم ليل نهار نجتهد فى سب ولعن الجميع وانتقاد كل الناس وكل السياسات وكل الحكام وكل من جلس على الكرسى ومن نام على الحصيره


او لنكن اكثر فاعليه ....لنحرق هذا الوطن


امضاء
شاب خايب