Saturday, February 25, 2006

وماله ....... ياسلام عليك يا عمرو دياب

شفت وشفنا كلنا كليب عمرو دياب الاخير وماله اللي نزل في في الفلانتاين داي, الاغنية بالطبع لا يختلف عليها اتنين فهي من اجمل ما غني عمرو دياب, لكن لو قيمنا الالبوم الاخير لعمرو فمن وجهة نظري انه مش حلو او مش علي مستوي عمرو دياب, ودي وجهة نظري طبعا, وانا كنت بقول من سنة ونص وبالتحديد لمل نزل البوم ليلي نهاري اللي كان غاية في الروعة ان البوم ليلي نهاري هيسبب مشكلة لعمرو دياب عندما ينزل الالبوم الذي يليه,لماذا؟ لان البوم ليلي نهاري في منتهي الجمال ومن الاخر مفيهوش اغنية واحده وحشة او نص كم علشان كده هيعمل مشكلة لعمرو عند طرح الالبوم اللي بعده لان الناس هتقارنه بليلي نهاري وهذه المقارنة التي ستكون بالطبع في صالح ليلي نهاري. من هنا نري سبب عدم ظهور هذا الالبوم بمستوي عمرو, نرجع لكليب ومالو, الصراحو الكليب معجبنيش خالص واكتر ما استفزني في الكليب هو الزووم الجامد علي وجه عمرو طوال او معظم فترات الاغنية فالمخرج لم يتذكر انه ممكن يظهر أي حاجة تاني من ديكور,شوارع , كومبارس, موديل حتي او أي حاجة تاني الا في اخر الاغنية حتي الحفلة اللي راحها عمرو والموديل اللي معاه لم يظهر منها الا وجه عمرو وبزوم يملأ كامل الشاشة, اللهم الا في اخر الحفلة واخر الاغنية لما شفنا وعرفنا ان كان في ناس تانية في الحفل!!!, الشيء التاني فهو الموديل فبالرغم ان البنت عيونها حلوة لكنها الصراحة تتمتع ببرود شديد اعطي الاغنية الرومانسية جمودا وتقشفا, اخيرا بقي لبس عمرو دياب فده شيء مش هعلق عليه لان اختيارات عمرو للملابس التي يصور بها ويظهر بها لا يختلف عليه اتنين انه بيجانبه التوفيق فيه والدليل السبحة او ما يشابها التي يرتديها في الكليب, واخيرا لماذا لا ادري وضعت مقارنة بين الكليب ده وكليب صابر الرباعي اتحدي العالم يمكن لان الاغنيتين يذوبان في الرومانسية, لكن كليب صابر الرباعي يتفوق بمراحل في تصوير حالة العشق والحب والاندماج بينه وبين محبوبته وهو الشيء الذي توج بمشهد حملها ووضعه يده علي بطنها يتحسسها ويتحسس ما بداخله من روح فأعطي الكليب روح من الدفء والعشق

2 comments:

Ahmed Shokeir said...

واضح انك معجب بعمر دياب أوي .. عموما الشريط حلو بس بعد فترة هاتكتشف كده

daktara said...

الصراحة انا فعلا باحب عمرو دياب وهو المفضل عندي في هذا الخط من الغناء
علي اعتبار وجود خطوط اخري متنوعة ممثلة في كاظم الساهر, هاني شاكر, اصالة وماجدة الرومي
اما بالنسبة للشريط الجديد لعمرو فلأن انا بحبه والواحد لما بيحب حد بيستنة دائما اعماله ان تاتي في غاية الروعة والكمال وهذا طبعا ما لا يقدر عليه احد, لذلك اجدني دائما وعند طرح اي البوم لعمرو يكون رأي انه وحش ومش علي نفس المستوي لكن بعد فترة من سماعة اجده جيد للغاية وهذا ما حدث معي ايضا في شريطه الرائع اكتر واحد بيحبك, لكن حاسس ان الشعور ده مش هيتكرر مع الالبوم ده لأني منحته وقته الكافي دون ان يكون له نفس التأثير