Thursday, January 25, 2007

لا فض الله فوهك ايها اللواء .... واتضح ان المجرم اخواني


في برنامج 90 دقيقة النهاردة اتهم اللواء محمد عبدالفتاح عمر , وكيل لجنة الدفاع والامن القومي اتهم مجرم المعادي الذي لم يقبض عليه او حتي تحدد شخصيته حتي الان انه اخواني وان الاخوان المسلمون هما اللي مدبرين الموضوع ده قال ليه علشان يلهو الامن ويشغلوه
لا فض الله فوهك ايها اللواء ايه النباهة والعبقرية دي
احنا اتعودنا دايما ان المجرم مجنون مختل عقليا اهبل حتي الصحافة الحكومية حفظت استامبة وزارة الداخلية وقالت انه مختل نفسيا حتي قبل ما الوزارة تقول
اما موضوع انه اخواني فدي جديدة خالص ويظهر ان ده تأثير الفكر الجديد فطبعا ومن غير ما اعرف اللواء اكيد حزب وطني والا ماكنش مسك وكيل اللجنة المذكورة , طبعا كلامك لا يعقله عيل صغير بشخة ايها اللواء وواضح ان فكرتك عن الشعب المصري توقفت عند حدود النجوم اللي كانت علي اكتافك
انا لن ادافع عن الاخوان ليس لان الكثير منهم علي اعلي مستوي من الثقافة والتعليم والكثير منهم اساتذة جامعات واطباء ومهندسين ووو... ولكن لأنهم اصلا مش متهمين خاصة في الموضوع ه ده ولكن اللي نستخلصة من تصريحات اللواء الاتي
اولا الحملة الشرسة ضد الاخوان مستمرة رحاها ولم تكتفي الحكومة والحزب الحاكم بلعن سلسفين ابوهم يوميا في برامج يطلقوا عليها الحرية وعدم وجود خطوط حمراء وهي في الاساس كلها خطوط حمراء ويكفي عدم وجود طرف اخواني في جميعا للرد وهذا ابسط حقوق الحوار
ثانيا اننا وصلنا لمرحلة قلب ترابيزة الاتهامات علي الاخوان فالحكومة شايفه انه كل لما تطلع مصيبة او قضية فساد كبري يكون واقف وراها عضو من الحزب الوطني زي غرق العبارة واكياس الدم الفاسدة وغيرها الكثير , فرأت ان تسبق و تتهم الاخوان وخاصة في قضية هلامية وغير معروف الفاعل فيها , واعتقد انه بعد هذا الاتهام لن يظهر ابدا حتي تظل التهمة لابسة الاخوان
ثالثا يا سيادة اللواء روح داري علي خيبة وزارة الداخلية وعدم قبضها علي المتهم بحجة اخري مش الحجة العبيطة دي امسكوا المتهم الاول بعدين اخونوه وفدوه ناصروه حتي , لكن كده ..... شكلك بقي وحش قوي
رابعا هو البرئ اصبح متهم حتي لو لم تثبت ادانته ولا ايه يا سيادة اللواء
خامسا يا سيادة اللواء ده مجرم اقبض عليه وحاكمه حسب القانون , لكن موضوع تصنيفه ده غريب قوي يعني لو طلع فعلا اخواني هل العقوبة هتختلف عن لو كان وطني ولا وفد ولا تجمع , في اي شرع هذا وهل كل المتهمين يتم تصنيفهم قبل محاكمتهم ولا ايه , اما صحيح شئ ورأي عجيب جدا من رجل شرطة
سادسا العيب مش عليك انت ايها اللواء فانت بتنفذ تعليمات اللي فوق او حتي بترضيهم وخلاص لكن العيب علي اللي اداك صوته ونجحك في الانتخابات وخلاك عضو مجلس شعب وانت علي هذه الدرجة من التفكير , او حتي علي الاقل من التفكير بأن المصريين اغبياء قوي علشان يصدقوا الكلام ده
يا سيادة اللواء اتكلم في اللي بتفهم فيه احسن ويا الف حسرة وندامة علي الامن القومي والدفاع طول ما فيه ناس ده تفكيرهم

9 comments:

محمد عبد الغفار said...

مهو الراجل مغلطش هو فرق دلوقتى بين المختل عقلياً والأخوانى اى حد فى المجتمع دلوقتى يعرف اى حد اخوانى بيقول له انت مش ناوى تعقل بقى وتسيبك من الكلام ده بدل متتبهدل فكل الإخوانجيه فى نظر المجتمع الأن مختلين عشان حاطين راسهم فى حنك السبع

المهم ان كلام سيادتة اللواء سواء جاى من فوق او جاى من تحت محدش بيصدقه والحملة الشرسه عليهم لم تولد الا الخوف والتعاطف ولم تفرز اى اقتناع

مهما قال اللواء او جيش من اللوائات وكل البرامج الحواريه والجرائد القومية فالمتلقى عارف وفاهم والدليل اللى انت كتبته

كلام لوجيك said...

للأسف الشديد ان ضباط مجموع الخمسين في المية فاكرين انهم اذكى من شعبهم الوديع
وزي ما قلت قبل كده انهم بيتغابوا بتصرفاتهم النابعة من عقول مغلقة امام كل مفردات الحياة ماعدا اوامر قياداتهم العليا
والله يا جماعة انا بتكسفلهم بعد كل فضيحة من فضايحهم اللى مابيعرفوش يتعاملوا معاها بحنكه وذكاء
شكلهم بقى بايخ قوي والله
واتفق مع اخويا محمد جعفر في ان كل حملاتهم الاعلامية الفاشلة الخالية من المنطق لم تولد الا عكس ما يريدون

وانهى كلامى بحوار شاهدته لأحد افلام نور الشريف الذي لا اتذكر اسمه وتدور قصته عن احد افراد حرس الحدود الذي رفض كل المغريات وحافظ على شرفه وامانته وكشف عن عملية كبري بعد رفضه رشوة بمبلغ خيالى وبعد ان قام بمجاراة العصابه، وعندما قاموا بعمل لقاء معه في التلفزيون كانوا كلما يسألوه عن شئ كان يستهل اجابته بالكلمة التاليه
بناء على تعليمات السيد الوزير وسيادة اللواء الفلانى قمت بكذا وكذا
وظل يردد هذه الجملة قبل اي اجابه حتى قالوا له مبروك على هذه الترقية وعلى امانتك
فقال لهم : بناء على تعليما........الله يبارك فيكم


دمتم بخير
اسامة سامى

همس الليل said...

ايه يا دكتره الكلام الكبير دا
بعدين البلد دى بقت هوبلس كيس

tota said...

دكترة
الشماعة الفاشلة التى يعلق عليها رجال الشرطة فشلهم اصبحت تالفة لا تصلح للتعليق
سواء كان المتهم مختل او معترف بالطبع تحت تأثير التعذيب
او الشماعة الجديدة انه اخوانجى
للاسف الشرطة فقدت الوسيلة التى كان يجب ان تلجأ اليها وهو البحث والتحرى وجمع الادلة وبعدها توجيه الاتهام ثم يلعب القضاء دوره
اما عن الدور الذى يلعبونه الان فهو اسوء الادوار على مر العصور
دور تعذيب الشعب لا حمايته دو الصدفة التى تكشف الجرائم دور ابتزاز الشعب واستغلال السلطة
صورة سيئة والالطف انهم يحتفلون بعيد الشرطة اى شرطة هذه
رحمنا الله منهم

تحياتى

حائر في دنيا الله said...

الحرامية....أخوان
اللي سرطنوا البلد...إخوان
الوريث الجاي...إخواني
المفسدين...إخواني
المنافقين...إخوان
بتاع أكياس الدم...إخواني
اللي غرق العبارة...إخواني
اللي حرق القطر...إخواني
اللي خلا مصر تتغلب من زامبيا انبارح بالتلاتة..برضة إخواني

يبقى لازم وأكيد ومن الطبيعي والمنطقي أن سفاح المعادي
إخواني

دي مفهومة أوي يادكتور

Scorpio™ said...

انا مش شايف اي غرابة فكلام الراجل..وهو في اية منطقي اساساً فالبلددي؟؟!!

محمد عبد الغفار said...

انت متدبس تدبيسه كده عندى ابقى تعالى شوفها

حلم الحرية said...

بصوا احنا منحاولش
الاخوان هما سبب غرق العبارة
هما سبب وقوع الطيارة
هما سبب حريق القطارات
هما سبب اولاد الشوارع
هما سبب الفساد
والرشوة
والبطالة
وتاخر الزواج
والفقر
والامية
حتي سفاح المعادي طلع اخوان
والحكومة بريــــــــــــــــــــــــــئة براءة الذئب من دم بن يعقوب
اما انتوا ناكرين للجميل صحيح..... الحكومة دي خيرها علينا بس احنا اللي زي القطط بتاكل وتنكر بقي الحكومة بعد الشر هيه سبب الحاجات دي لا طبعا
الاخوان هما السبب

daktara said...

478http://secretloverslane.blogspot.com/