Saturday, January 13, 2007

قصص حب حقيقه فاشله بعضها مفعم بالمشاعر والبعض الاخر برضه مفعم....... سلسله جديده


nothing like this قرأت اليوم بوست في المدونه الجميله
بعنوان سبب لوقوعك في الحب من غير سبب, عجبتني جدا يمكن لأنها حقيقيه جدا وبتحصل معايا بمنتهي الدقه , ودفعتني وشجعتني علي كتابه سلسله قصص حبي الفاشله اللي تردت كثيرا في كتابتها لكن امرنا لله , واولا عايزكم تعرفوا اني هكتب بمنتهي الصدق والدقة وهبدأ بالتسلسل الزمني من اول قصه حتي الان
مقدمه طبيعيه
اولا انا شخص ملتزم , مش قوي يعني , ممكن تقول شبه ملتزم حاجة زي شبه المنحرف في الهندسه كده وان اي واحده بابدأ أكلمها واحاول ادخل معاها في علاقه فان نتيتي صافيه وبجد اتمني الارتباط بها وليست للتسليه او تقضيه الوقت
ثانيا انا زوقي في البنات صعب جدا , ومبتعجبنيش غير البنت البرفكت الجامده فعلا اللي جمالها يخلي الاعمي يفتح والاخرس يغني علشان كده قصص حبي .... مش عارف ممكن معقده شويه
ثالثا انا هاكتب القصص اللي تمنيت فعلا اني اكمل حياتي مع بطلتها فقط ولن اكتب عن العلاقات الخطافي الطايره لاني لا احب الاستمرار في علاقه لا اتمني لها النهايه الطبيعه
قصه حب فاشله رقم واحد
انا كنت طول عمري مليش في موضوع العلاقات ده حتي في عز فتره المراهقه مفيش مانع اني اعجب بواحده غالبا من نفس الفصل وغالبا بتتغير كل سنه مع تغير الفصول , لكن عمري ما كلمت واحده عن حب او ارتباط او خلافه لدرجه اني اتخانقت قبل كده مع بنتين مره وانا في تالته اعدادي ومره وانا في تانيه ثانوي لانهم كانوا بيحاولوا يقربوا مني جدا وده مش لأني واد تقيل لكن لأني مكانش في دماغي من ناحية وهم مكانوش مطابقين للمواصفات من ناحية اخري
اما عن اول قصة حب تمنيت انها تكمل للنهايه كانت وانا في سنه تانية في الكليه لما اتعرفت عليها كانت ملاك يسير علي الارض في منتهي الرقة والجمال , هي مكانتش معايا في الكليه هي كانت في كلية اداب وفي جامعة تانيه وساكنة في محافظة تانية كمان امها كانت لبنانية وابوها مصري وده يمكن يوضحلكم منتهي الجمال اللي كانت عليه , عشنا مع بعض فترة جميلة للغاية بس للأسف كانت فترة قصيرة جدا حوالي تلات اربع شهور بس لغاية ماحصل الموقف النهائي واللي بسببه انتهت العلاقة
كان بقالي فترة مشفتهاش وطلبت كذا مره منها اني اشوفها لكنها كانت بترفض وتتحجج بحجج واهية وميصدقهاش عيل لغاية ما فيوم قالتلي ان في فرح لواحدة قريبتهم واني ممكن اجي واشوفها في الفرح كان في محافظتها, وفي يوم الفرح رحت غسلت الحتة اللي الحبل وكويت الحتة اللي الحبل وبعدين لبست الحبل معلش قصدي لبست الحتة اللي الحبل ورحت لابس اشيك ساعة عندي وحاطت من اغلي برفام ورحت مطلع اقدم قزازة براندي عندي واللي تاريخا يرجع ل 1901 ورحت واخد منها رشفة ورجعتها الخن تاني , وبعدين نزلت نقيت افخم عربية عندي , علي اعتبار اني عندي كذا واحدة يعني ما انا مش هاقولكم اني نزلت اتبهدلت في المواصلات والهدوم اتكرمشت والبرفام تحول لريحة بنزين وهباب ما علينا , وصلت مكان الفرح وقلبي بيدق خلاص هشوفها بعد فترة وبعد ما وحشتني جدا وفضلت مستني اترقب الوجوه هي دي لأمش دي هي دي لأ مش دي وفضلت مستني مستني مستني لغاية لما قارب الفرح علي الأنتهاء قولت اتصل بيها واتصلت اتصلت اتصلت ملقيتش حد بيرد طبعا اتضايقت جدا ورجعت قفايا يقمر عيش وبعدين فوت يوم والتاني لعلها تتصل تعتذر او تقول اي حاجة ولكن لا حس ولا خبر, رحت متصل بيها لسه بقول الو لقيتها بترد ببهجة وفرح وحنية قلت في سري هي هتعمل دور العبيطة ولا ايه؟ رحت متدهاش فرصة وقعدت اديها علي دماغها لغاية ما طلعت شعلة الغضب اللي جوايا ورحت قافل السكة ومن ساعتها لا كلمتها ولا اعرف حاجة عنها
ولكني لحد الان ندمان اني مسمعتش منها ومسبتلهاش فرصة تدافع عن نفسها ,وكتير بفكر اتصل اعرف اخبارها علي الاقل لكن كرامتي بتنقح عليا

26 comments:

tota said...

دكترة
واضح ان الموضوع فى سلسة يعنى ولا كتاب الف ليلة وليلة

طيب البداية طبعا مؤلمة يمكن لو مكنتش لبست اللى عل الحبل وروحت لمحافظة تانية كنت سمعت منها ايه اللى حصل ولا ده مفعول البراندى
لكن الغضب دائما يصم الاذان
ودى كانت
الاول

منتظرة باقى السلسلة
تحياتى

samvet said...

هو دى قصة واحدة بس
عيزين الباقى
بس تعليقى ع دى
سيبك من المستورد(اللبنانى) وخليلك فى البلدى
ابق واكثر ضمانا لفترة اطول
مستنى الباقى
تحياتى

Memo said...

و انت بتسمي ده حب...
لما تحب بجدهتلاقي عواطفك و كل جوارحك حتى كرمتك هوا حبيبك
بس أسلوبك رائع و شيق جدا لدرجه اني قريت حجات اكذا مره
.. استمر

Tamer Nabil Moussa said...

قصص الحب الفاشلة تتكرر كل يوم

بس الاسباب مختلفة

واحنا علينا نتابع ونتعلم

تحياتى

علا من غزة said...



يا عيني عليك يا مسكين ,, طب يعني بالسهولة دي نسيت كل حاجة يا خاين


ههههههههههه


لا بس بجد انت غلطان ,, نصيحة اذا لسه معاك رقمها كلمها فورا ,, الا ازا خلاص زهقت منها :p
لا مليش دعوة القصة ناقصة كتير ,,, التانية بءى ياريت تفصل اكتر وكمل بنفس اسلوبك الحلو ده ,, ماشي؟
سلام

أسوور said...

مش عارفة ليه حاسة انك دورت عليها فى الفرح كله بس نسيت تبص فى الكوشة

sara86 said...

ياحرام

بس ده عمرك متقدر تقول عليه حب
بيقولوا الكرامه ترف عند العاشقين

كمل

كلبوزة لكن سمباتيك said...

يعني اية لازم تكون برفكت
يعني انت برفكت؟
يا سيدي تواضع لله و ارضى بالقليل ربنا يبارك لك فيه

علشان كده لحد دلوقتي بتقول القصص فاشلة

مالها زينات صدقي
:(

raspoutine said...

يا راجل اتصل وخوض التجربه هتخسر ايه
وبعدين لو هيا بتحبك هتسمعك وتقابلك لكن لو قالتلك لاء مينفعش متزعلش وحاول تانى البنات حساسه اوى وعايزة الحنيه مش تقولى كرامتى وبتاع
اجرى يا راجل اجرى اتصل بيها وابقى تعالى قولى عملت ايه

حائر في دنيا الله said...

الفشل صنيعة الانسان
وصنيعة اختياراته الخاطئة من الاساس
اللهم ابعدنا عنه
وابعده عنا

daktara said...

تنوعت الاراء والاتجاهات
tota
ممكن فعلا يكون تاثير البراندي
mansourawy
انا قلت اجرب المستورد مره ما احنا نطول عمرنا بناكول البلدي
Memo
عندك حق
tamer
اكيد لازم نتعلم من تجارب الاخريين
3ola
لا والله مانسيتش
بس مانسيتش ايه والله مانا فاكر
ياسمين
تصدقي عندك حق , بس انا فعلا شبهت علي العروسة
sara86
ممكن

Sampateek
اكيد طبعا انا مش بيرفكت ومفيش حد بيرفكت
بس هي مين زينات صدقي دي ياااااه ده انت قديمة قوي
حائر في دنيا الله وraspoutine
عندكم حق

Yasmine Adel Fouad said...

بقولك لو عايز صورة مصر اللى عندى وماله اتفضل

daktara said...

انا حرة
شكرا جدا علي زوقك ونردهالك في المناسبات ان شاء الله

Anonymous said...

FOFOOO
يعنى انت حاسس انك غلطان وكمان انت اللى كرمتك نقحه عليك بص لو حبيتها بجد يبقى ماينفعش تضيعوا كل حاجة لاى سبب من الاسباب سورى دة اصلا مش سبب الولد العاقل يعرف يحافظ على حبيبته لو انت واثق من حبها حس بيها واعرف هى عامله ايه دلوقتى من غيرك

Anonymous said...

بداية بهنيك على اسلوبك الحلو بالحكي وبدي احكيلك شغله مهمه ومعروفه وانا شخصيا متمسك فيها بشكل كتير كبير الحب عبارة عن تضحيه ومن دونها ما في حب يعني انت كان لازم تتحمل كرمال حبك الها وما تتخلى عنها بسهوله ونصيحتي الك رنلها باسرع وقت وما رح تندم لانك بتحبها

nawras el 7azeen said...

اول شي انت قصتك مش مستاهلة كل هدا لانو قصتي انيل منها
انا قصتي اني حبيت اخت اعز انسان عندي الي اهلي طبها ما بدهم انضل مع بعض والبنت مقرية فاتحتها وبالمناسبة انا عمري 17 وهي عمرها 15 بس حبنا اكبر بكتييييييييييييييير من عمرن الان انا كنت عارف انو مقرية فاتحتها على ابن عمتها عشان هيك ما اعترفتلها بشي بس مع الوقت هي لاحضت وفتحت الموضوع معي و حكتلي انها بتحبني كمان من زمان ..........الان عد كم مشكله عندك...........
1_انا عمري 17 يعني ما بقدر اعيشها
2_اخت صديق عمري يعني مجرد حبي الها هو خيانه
3_البنت مقرية فاتحتها
4_اهلي ما بعطوني اياها
5_مش قادر ابعد عنها دقيقة وحدة مع اني مسافر ومش قادر اوصللها
فيا صاحبي انت البنت عندك تلفونه ومش مرتبطه واكيد بنت عالم وناس وانت دارس وبتشتغل يعني بتقدر اتعيشها ومافي مشاكل مع اهلكو وبتمنى متل ما نصحتك انك تنصحني عشان ارتاح
zaidgamaz@hotmail.com
الاردن

tafahat said...

السلام عليكم قصدى هاى المهم يا دكترة طريقة تفكيرك ف رايى وحشة جدا انا اسفة انى بتكلم بصراحة لازم عشان تدور بجد ع البنت اللى هاتكمل معاها باقى عمرك لازم تحط ف دماغك اسس تمشى عليها صح يعنى مش بس تهتم بالشكل الجميل و كدة لا ماينفعش قولى كدة تقدر تعمل اية لو البنت دى الجميلة بعد ما اتجوزتها حصلت حادثة و فقدت جمالها اية اللى يحصل ساعتها كدة الشكل هايبقى ضاع و اللى هايفضل هى الشخصية هاتقولى انك هاتسيبها و تدور على غيرها هاقولك طب تفتكر ان ربنا هايسيبك اتقى الله و فكر صح و ماتعلقش نفسك بتفاهات و افتكر ان الانسانة اللى هاترتبط بيها مسيرها تكبر ة جمالها يروح و تبقى الشخصية و الروح اللى هاتعيش معاها راجع نفسك ف اختياراتك و ربنا يوفقك و بالنسبة للبنت دى فانا بقولك انت رايك صح خلى كرامتك فوق كل شىء دة التفكير الصح و بعدين هى اساسا لو كانت حبتك و فكرت فيك جد كانت دورت عليك و عملت المستحيل عشان تشوفك سلااااااااااااااام قصدى باى

eagle said...

أنا مش هاقول زى ماقال الجميع
أمشى ورا قلبك وهو اللى هايوديك للطريق الصحيح

RORO said...

انت تسرعت كتير انك ما اعطيتها مجال انها تبرر موقفها او تبين العذر اللي خلاها تعمل هيك..
الحب اخد وعطا مها كان الموقف اللي انت تعرضتله واكيد ازا كان الكم نصيب تكملوا كان كملتوا بس هاد اللي ربنا كاتبه وبالتوفيق

BeastMaster said...

انا عايز اعلق على قصة حبك دى بحاجة بص اناكنت بحب واحدة و لغاية الان لسه بحبها اقصد بتمناها تانى بس للسف الدنيا بتتغير فى الاحسن و فيه الاسوأ ودايما كلنا بنتمنى الاحسن المهم حبيتها 6 سنين متواصل و جيت عملت موقف بسيط اوى بس يعتبر خيانة زى ماتقول خاصمتها بس هى فى جوه القلب برده بس شوف بقى بعد قد ايه 6 سنين هو العمر يعنى فيه كام منهم بتمنى نحاول ننسى حواراتنا دى و نفكر فى المستقبل شوية لان الحوار ده سبب فى انتحار ناس كتير اوى ونصيحة من اخ ماتخليش حد هو الى يوجعك خلى نفسك انت الى توجعك علشان نعيش ويارب لو فيه خير انك ترجعالها تانى و هى ترجعلك يارب يوفقك بس ده لو انت بتحبها بجد و انا كذلك اخوك عبد الرحمن ده اميلى ياريت تضيفه فى اسرغ وقت
BeastMaster_hero@hotmail.com
she_is_my_lover(1)@yahoo.com
BestMaster_hero@skype.com
BeastMaster_hero@ICQ.com

Anonymous said...

انا كونت عايزة اقولك ان مشكلتك دي سهلا تتحل كلمها وشوف عملت كده ليه الدنيا مش افش انا عايزة حد يقول اعمل ايه انا بحب واحد وعشنا اجمل قصة حب لمدة سنة ونص ومخدوعا فيه المهم لما تمانا سنة جبتلو هديا وروحت اشوفوا اكتشفت انو مصاحب عالايا وكان دة في امتحناتي وانا ثانويه عامة وبدأت المشاكل من ساعتها وبأ يعملني وحش كأني انا اللي خونته وكنت هسيبه نس قولت مش اظلمو وبجد مش قادرة ابعد عنو بس وبعدين اكتشفت انو بيكدب عليا كتير فقولت اكيد مش هكمل مع واحد كداب بس قومت خليت بنت تشوفو هيتعرف عليها ولا لاء بس اتعرف عليها وقلها انا عمري محبيت حد ونفسي اخطب ونفس الاسطوانه قامت البنت مسكت موبيلو وتلعت الصور بتعتنا وسألتو مين دي قالها دي بنت خالتي وحلفلها علي المصحف وانا اول معرفت كلمتو فقالي ايوه يا حبيبتي فقلتلوا حبيبتك مش بنت خالتك ومش عايزه اسمع صوتك تاني
بس انا بحبوا اوي بس مش قادرة ارجع

Anonymous said...

حلوة متدين ومعتق براندي عجبتني اوي اوي :)

Anonymous said...

والله انا شايفه انك لازم تكلمها ده حب سنين واكيد فى ظروف اجبرتها على كده انت لازم تفهمها والا هتفضل تكلم نفسك كل يوم ولما تكلمها وتفهم كل حاجه هتعرف وضعك كويس بس لبنانيات ايه ياعم دول خليك فى الى زيك هيوفو اوىىىىىىى

Anonymous said...

لاية دايما بتسموها كرامة اللي يحب بيعدي ويتحجج للي بيحبه حتي لو قتله بيدور علي حجة تبرر هو قتلة لاية مش تقولي تقلت عليك شوية وبعدين حقها دي لبنانية ولا اية؟؟؟؟؟؟؟؟؟؟؟؟؟؟؟

Anonymous said...

لا اوعي تتصل بيها كفايه اوي انك قدرتها وسافرتلها لبلد تانيه ولبستلها الحته الي علي الحبل وهي مقدرتش كل ده لو هي فعلا بتحبك كانت هتتصل بيك وتبررلك موقفها او حتي كانت اتحججت .. لكن هي شكلها مصدقت اصلا

رؤى الأعرجي said...

السلام عليكم
أحب أن أقول بإن الغضب كان دوما من أهم أسباب خسارتنا لكثير من الأشياء وبأنه كان بإمكان الأخ أن يستمع الى تلك الفتاة عله يجد في عذرها ماهو منطقي ومقبول، لو كان كل إنسان وقف على أي خطأ يكتشفه في الاخرين لما كلم أحدنا الآخر علينا إكتشاف مواطن القوة في أنفسنا وأهمها تحمل الآخرين والإنصات لهم ولاأضنك تحبها لدرجة كبيرة لأن من يحب يغفر ،يضحي ،يسامح.
رؤى الأعرجي