يارب النصر لدراويش مصر

يا رب الاسماعيلي يكسب في المبارة القادمة

طبعا المباراة بين الاسماعيلي والاهلي في قبل نهائي الكاس

يارب بالتوفيق للدراويش

شوري شوري شوري ....... كلنا كده عايزين شوري

النهاردة وفي انتخابات التجديد النصفي لمجلس الشوري وكالعادة كنت موجود , وكالعادة الاحداث تكاد تكون شبه محفوظة مع بعض الاختلاف البسيط في كل مرة تجرى فيها الانتخاباتالنهاردة صحيت الصبح لبست هدومي وتوجهت الي مركز الاقتراع, بعد ما اخدت جولة علي كل اللجان الموجودة تأكدت ان الاقبال ضعيف جدا, وفي مركز الاقتراع وجدت اعضاء الحزب الوطني واللي انا اعرفهم اصلا بصفتهم جيران لي ومعظمهم كانوا مدرسيين لي في مراحل التعليم , سلمت عليهم وقعدت معاهم, ولا اخفي عليكم سر اذا اخبرتكم اني امين الشباب في احد الوحدات المحلية للحزب الوطني في محافظة الاسماعيلية , المهم الناس طلبوا مني اقعد علي الكمبيوتر واطلع ارقام واماكن اللجان للناخبين من علي الكمبيوتر لأن معظمهم طبعا شيش بيش في الموضوع ده, قعدت وشغلت الاسطوانة اللي جايه من الحزب , الاسماء نازلة من الكشوفات علي سكانر والصور كلها موضوعة في برنامج ادوب اكروبات وطبعا البحث عن اي اسم اصبح شيء في الخيال قلتلهم اللي يجي دوروا علي اسمه في الكشوف الورقية لأن الاسطوانه دي مش هينفع البحث عليها, قام واحد منهم قالي نزل الاسطوانه في فولدر قلتله نزلتها قالي اعمل بحث في الفولدر ده بقي قام رد واحد تاني قال لأ نزل الاسطوانة علي السي بعدين اعمل بحث علي السي كتمت ضحكتي وقلتله حاضر اجرب الفكرتين,

ولأن الاقبال ضعيف جدا كان كل ما يجي واحد ابعته للكشوف الورقية, بعد شوية جه مدرس الفرنساوي بتاعي ايام الثانوية وهو معروف انه عضو في جماعة الاخوان المسلمين سلمت عليه وطلعتله اسمه ورقمه , بعد شويه دخل عضو مجلس الشعب الحالي عن دايرتنا وهو من الاخوان المسلمين وياعيني الراجل ماشي معاه واحد بس من قيادات الاخوان برضه مش زي الزفه الكذابة اللي بتبقي مع الناس التانيه , المهم الراجل سلم علينا وبعدين وهو ماشي سأل واحد قاله هو ده كمبيوتر المدرسه رد قاله اه قام ضحك وقال يعني منها فيها ومن دقنه وافتله وبعدين مشي الراجل صعب عليا , بعد شوية دخل شاب بيسأل علي رقمه ومن النقاش معاه كان واضح انه هينتخب مرشح الاخوان , واحد من اعضاء الحزب حاول يقنعه ينتخب مرشحي الحزب قام قاله انا مبحبش الحزب الوطني , بعد ما مشي لقيت اتنين من اعضاء الحزب بقولوا علي مؤيدي الاخوان انهم عندهم الثقة العمياء , الكلمة استفذتني وقلتلهم لا ثقة عمياء ولا حاجة طب ما انتم عايزينه ينتخب مرشحي الحزب من غير ما يشفهم بل بعضكم بينتخبهم وبيسوقلهم من غير ما يشوفهم وعلي فكره انا كمان ماشفتهمش اصلا يبقي الموضوع لا ثقه عمياء ولا دياوله هو مؤمن بفكره وهو حر ينتخب اللي هو عايزه

اللعبة الكبري اللي عملها الحزب بقي هي وجود اسم مرشح الاخوان وبجوار صفته فئات في ورقة الترشيح رغم انه داخل عمال ودعايته كلها بتقول انه عمال وهذا لأن مرشح الفئات للحزب فرصته اكبر لأنه فعلا راجل محترم اما مرشح العمال وان كنت اسمع انه راجل يعرف ربنا فكانت فرصته اضعف ولذلك الكثير وانا منهم كنت انوي اعطاء صوتي لمرشح الحزب فئات ولأنه كمان والد واحد صاحبي , واعطاء صوت العمال لمرشح الاخوان لكن لما لاقيته في الورقه فئات وعلشان الصوت ميضعش اضطريت اعطي صوت العمال لمرشح الحزب ايضا ولما طلعت وسألت علي الموضوع ده قالولي دي غلطه وجه اعلان بكده وتم اعتباره عمال بس طبعا بعد ما الناس وانا منهم اتلخبطوا مما ادي لضياع بعض الاصوات الذاهبه له , عموما الاتنين ضاعوا بسبب التزوير اللي حصل بعدين
علي اخر اليوم كان الحضور في اللجنة الواحدة لا يتجاوز المائة صوت , وقبل قفل باب الاقتراع جه الشيطان الاكبر واحد اعضاء الحزب الوطني واعطي لكل واحد من الموظفين المشرفيين علي اللجان الانتخابية خمسين جنيه ومسك بطاقات الترشيح وعلم علي حوالي اكتر من ثلاثمائة بطاقة في اللجنة الواحدة بما يفوق خمس اضعاف الحضور تقريبا , اخيرا بقي لي انا اقول ان
اولا رغم اني امين الشباب في احد الوحدات المحلية للحزب الوطني الحاكم الا اني كل ما احاول اقنع نفسي احب الحزب الوثني ده الاقي مليون سبب يخلوني اكرهه واكره افعاله واشخاصه

ثانيا كل واحد من انصار الحزب واللي تم عمل توكيلات لهم بالحضور في اللجان كل واحد اخذ اربعين جنيه وكارت موبايل بعشرة جنيه , وان كنت سمعت ان الفلوس اللي جايه من الامانة العامة اكتر من كده

ثالثا الشيطان الاكبر اللي زور في الانتخابات اسمه السيد حسن ورقم تليفونه *********** ايه رأيكم لو كل واحد اتصل بيه دقيقة واحدة بس قاله يا مزور ولا حتي بعتله رساله قاله فيها يا مزور الانتخابات اتقي الله

رابعا وقبل ظهور النتيجة فانا واثق من نجاح مرشحي الحزب بالاسماعيلية ثقة تامة بعد المنافسة الضعيفة والهزيلة من باقي المرشحين وبعد التزوير اللي حصلخامسا وهذه رساله موجهه للقضاة ارجوكم اشرفوا علي الانتخابات اشراف كامل تحت نظام قاضي لكل صندوق بدل الاشراف علي اللجان الرئيسية فقط لأنه عامل زي اشراف النعامة علي انتخاب الاسد ملك للغابة , والا انسحبوا بالكامل لأن التزوير في مثل هذا الوضع في رقابكم

اخيرا وانا كان مالي بالانتخابات ما انا كنت نويت لا اروح ولا اجي بعد التزوير اللي شفته في الاستفتاء اللي فات لكن تقول ايه بقي كنت رايح وانا اتمني حدوث الافضل لكن يظهر انه زي عشم ابليس في الجنه او عشم المعارضه في الحكم وحسبي الله ونعم الوكيل

د. خالد عزب

المطار السري ...... والتدوينة السرية

احنا ليه نحب نشتغل نفسنا دايما ونضحك علي بعض
يبقي الواحد كله باين والكل عارف انه بيعمل كذا وكذا وهو عامل زي النعامه دافس راسه في الطين وجسمه كله باين وقال ايه محدش شايفه ولا عارفه ازاي اقولكم
حاجة زي المطار السري كده مثلا ايام الحرب قال ايه الجيش عامل مطار سري, فين متعرفش ماهو سري بقي , سري لدرجة ان الناس كلها عرفته لأ وعاملوا محطة اسمها المطار السري وتلاقي التباع عمال يبنده واحد المطار السري وهو عمال يغمز بعنيه في الخباثة قال ايه سري بقي
ده زمان مثلا, اما دلوقتي تلاقي الحكومة بتحاكم الاخوان قال ايه بتهمة الانضمام لتنظيم سري هاهاهاها طب والنبي مين في مصر ميعرفش الاخوان ده انت لو سألت عيل بشخة ممكن يقولك تاريخ الاخوان من اول حسن البنا لحد ال 88 عضو في مجلس الشعب , طب ايه الغباء ده فين والنبي التنظيم السري ده طب والله انت لو سألتني عن عدد وزارات الحكومة ولا اسماء وزرائها ايه مش هاعرف اقولهملك كلهم يبقي مين التنظيم السري بقي الحكومة ولا الاخوان
الحاجة الاخيرة بقي ان انا كمان مش هاشز عن القاعدة فانا و لأن التدوينة دي سرية ممكن اقول اللي انا عايزة واشتم بقي براحتي واقول كل الكلام القبيح اللي انا ماسكه عن لساني ما هي تدوينه سرية بقي حاجة زي المطار السري كده
حد شاف حاجة؟

ديمقراطية الحوار ..... وديكتاتورية القرار

ايمن نور , طلعت السادات و مرتضي منصور

ثلاثة شخصيات بحبهم ومعجب بيهم جدا , عندهم هدف وفكرة وبيدافعوا عنها ومؤمن جدا بالكثير من افكارهم ومواقفهم

التلاتة صوتهم عالي وبيدافعوا عن الحق , طبعا التلاتة مش زي بعض وفي بينهم اكيد اختلافات ولكنهم جميعا يجمعهم قول وفعل كل ما لا يرضاه النظام , بل انهم في بعض الاحيان كانوا يعادوا النظام صراحة ( ملحوظة يعني ايه النظام ده , انا شايف ان النظام يعني الحكومة والحكومة يعني المؤسسة الرئاسية والمؤسسة الرئاسية تعني الرئيس ولا احد غير الرئيس ) وينتقدوه نقدا عنيفا ويعروا كل عيوبه

ولأنهم اعتقدوا لوهلة اننا نعيش عصر ديمقراطي او هكذا يحاول ان يوهمنا النظام فعلي صوتهم واتخذوا مواقف حادة وجد عندها النظام انه يجب ان يتخلص منهم قبل ان يكثر مريديهم ويصبحوا شوكة قوية في حلق النظام ونظام التوريث

علشان كده وفي عصر حرية الحوار ..... وديمقراطية القرار

سعادة البيه النظام قالهم كفاية يا حبيبي انت وهو, عندنا اماكن فاضيه عند الحبيب حبيب وكله بالعدل وهتشرفوا عند عدلي هيكرمكوا كام سنة نعلمكوا يعني ايه ديمقراطية

انم تتكلموا زي ما انتم عايزين وانا كمان اخد قرارات واوامر زي ما انا عايز ونبقي متعادلين,

لكن انا من مكاني هنا باقلهم اننا معاكم علي الاقل بقلوبنا وبنحبكم وبندعمكم وبندعوا الله ان يفك عنكم وعنا الغمة

ولن تخدعنا الالة الاعلامية لتشويه صورتكم ومحوا افكاركم ودفاعكم عن كل فكرة انتم مؤمنون بها ونحن معكم

ملحوظة

من ساعة ما اسامة الغزالي حرب ما استقال من لجنة السياسات في واقعة فريدة وانا معجب بيه ومعاه د. يحيي الجمل بعد ما اسسوا حزب الجبهة الديمقراطية

فهل يا تري صورتهم هتشرف هنا قريب ولا ايه؟ الايام هتورينا

د. خالد عزب

الله يكون في عون العاشق مننا

احيانا الواحد مننا بيحس انه نشيط وعنده حاجات كتير عايز يكتبها ويقولها
واحيانا بيحس انه كسول وخمول وملوش نفس يكتب او يقول اي حاجة
وانا الفترة دي بحس اني مكسل شوية عن التدوين ومقل جدا في متابعتي لبعض المدونات خاصة اللي بحبها منهم
معرفش ليه ؟ بس اكيد فترة وهتعدي
لكن برضه في موضوع من زمان عايز اكتبه وعايز اقوله , او علي الاقل وجهة نظر خاصة بي ولكني قعدت اجل فيها يوم ورا يوم لحد ما جاء وقتها في موضوعي القادم
حرية الحوار ...... وديمقراطية القرار

د. خالد عزب