Tuesday, January 15, 2008

يوميات طبيب شاب في شرم الشيخ


انا الان شغال في شرم الشيخ ومش عايز كل واحد يستغبي ويسألني السؤال التقليدي شغال ايه؟

انا متضعيتش سبع سنين في دراسة الطب ومجهود يهد جبال هباءا

ممارسة الطب مع الاجانب وعلاجهم شيء مختلف تماما عن التعامل مع المصريين طبعا الكفه مش في صالح المصريين تماما , وفعلا انا افضل اشوف مائة واحد اجنبي اسهل من التعامل والكشف علي واحد مصري

يكفي احترامهم لكلامك , لو قلت لواحد متتحركش من السرير يبقي هي الكلمة فعلا ميتحركش من السرير , لو قلتله كل كذا ومتكولش كذا ينفذ فعلا التعليمات ده غير طبعا انك مبتحطش في دماغك الدوا ده بكذا وده بكذا والروشته في الاخر عامله كذا جنيه وهيبقي كتير علي الراجل الغبان زي الواحد مبيقعد يحسبها بالجنيه للعيان المصري وخاصة الغلبان منهم وهم الاغلبية
قبل ما احكيلكم عن بعض الحكايات معاهم , هاقولكم حاجات فعلا انا مستغربلها زي ان كلهم بيشتكوا ان الجو ساقعة , صحيح احنا في يناير لكن الجو هنا في شرم الشيخ كويس بالنهار انت ممكن تلبس نص كم وبالليل تتقل شوية لكن لما سألت كذا واحد وقلتلهم ازاي ساقعة هنا وانتم عندكم الثلج في كل حتة ومغطي الشوارع بعضهم قالي ان الفكرة ان الجو هناك طول السنة او معظمها كده وهما متعودين ومستعدين لكن هنا بالنهار كويس او حار وبالليل بيفقد 10 درجات وبيبقي ساقعة فالتغيير السريع ده هو اللي تاعبهم , وجهة نظر بقي
واحد دنماركي من يومين بيقولي هو ليه الرصيف عندكم عالي قوي عن الشارع طبعا انا سكت معرفتش اقوله ايه هل اقوله ده انت تحمد ربنا وتبوس ايدك شعر ودقن ان فيه رصيف اصلا ولا اقوله ان احنا اساسا سلو بلدنا ان الرصيف للعربيات وفرش المحلات واي حاجة الا المشاه اللي مكانهم الطبيعي في وسط الشارع ولا اقوله انه عالي علشان العربيات متتطلعش عليه زي اي مكان تاني في مصر؟؟؟؟؟؟؟
شيء اخير في بوست النهارده بجد بجد التعامل مع الانجليز هو الارقي والافضل علي الاطلاق بغض النظر عن الكلام اللي بيتقال عنهم او عن معاملتهم ((اللي هو احنا يا مصريين بنقوله)) فالتعامل معاهم هو فعلا الارقي يمكن علشان انا دكتور وبعاملهم كدكتور ومريض وهما بيقدسوا كلام واوامر الطبيب , لكن علي اي حال التعامل معهم هو الارقي يليهم الدول الاسكندنافيه الدنمارك , فنلندا والنرويج وعلي نفس الدرجة الالمان ثم يليهم الاكرانييين وطبعا في اخر الليسته الروس
انتظروا البوست القادم هكلمكم عن اسوأ موقف حصلي مع واحدة انجليزية كانت هتموت مني بس الحمد لله ربنا ستر وعدت علي خير , قريبا ان شاء الله


انظر حولك

د. خالد عزب

27 comments:

MerMaid said...

السلام عليكم
انا مقرتش البوست بتاعك
هرجع اقراه
لكن انا بس عاوزاك تقرا تعليقي عليك في مدونتي

و السلام

MerMaid said...

انا قريت البوست خلاص

جيت تاني اهو

:)
مع اني متضايقة من معاملتك لية كطفلة و بتقوللي راجعي نفسك احسن
الا اني هعلق عندك مرة كمان

طبعا الغرب كله ناس محترمين في طباعهم و كويسين في تعاملهم مع غيرهم و بالذات الدكاترة
هم بيحترموا الدكاترة جدا
بالنسبة للشعب الانجليزي
هو فعلا من ارقي الشعوب
ملوك بقي و امراء

هستني كلامك الجاي
و الحمد لله ربنا سترها
:)
تحياتي

Desert cat said...

والله انا بعز الناس دى اولا لان اكتر حاجه بتعجبنى فيهم احترامهم لمواعيدهم
مش زى هنا ادى معاد
الاقى اللى جاى لى بعده بساعتين
وقتها مش بعبره او اعبرها
حقيقى يا دكتور اختيارك للتاعامل معاهم اختيار موفق

خمسة فضفضة said...

السلام عليكم ورحمة الله وبركاته

اللي بيتعامل مع اجانب بيبقي صعب عليه اوي يرجع تاني يتعامل مع المصريين
خصوصا لو في المجال الطبي ،

ربنا يوعدنا
:-D

Empress appy said...

هاااااااااى يا دكتور
هو فعلا الاجانب عندهم رقى فى التعامل وبيخافوا على صحتهم اما بالنسبه للرصيف وبما انى سافرت بره مصر وجوة مصر فده مشكله فظيعه جدا وانا كاتبه بوست كامل عنه فى معاناتى اليوميه مع الناس بسبب الرصيف بس المصريين كويسين برضه هو طبعهم عدم سمعان الكلام ميرسى انك نورت الكوكب عندى

daktara said...

mermaid
طبعا انا مش بعاملك كطفلة وان كان ده شيء كويس ده ياريت حد يعاملني كأني طفل والله هستريح
انا بس قولتلك انك صغيرة لسه
ومتهيألي ده كمان شيء كويس ياريت انا كمان افضل صغير علي طوووووول
اما عن كلمة راجعي نفسك احسن فانا فعلا اعنيها اعني انك تراجعي نفسك في رأيك ده مش اكتر
عموما تحياتي واتمني تزوريني دايما

daktara said...

Desert cat
علي فكره الاجانب هنا وكتير سمعتها
خاصة اللي متجوزين مصريين بيقولوا
egyptian time
يعني نص ساعة تأخير ساعة ساعتين اي حاجة الا الالتزام بالمواعيد
وده طبعا يختلف عن
uk time
or
europ time

daktara said...

خمسة فضفضة
والله عندك حق
انا مش عارف هارجع اتعامل ازاي تاني مع العيانين المصريين
بجد حاسس اني مش هأقدر
ربنا يستر

daktara said...

appy
طبعا عندك
وهافضل ازورك علي طووووووووووووول

محمد عبد الغفار said...

فرق حضاره

حسام مراد said...

ايه يا جماعه فى ايييييييييييه

معلش انا شايف ان كل اللى بيعلق خلاص هاااين عليه يتبرى من انه مصرى فى اييييييه
زى ما فى ناس زباله فى مصر ومعندهمش اى احترام فى المواعيد او التعامل مع الاخرين

فى ناس تانيه محترمه كتيييييييييير زى الاجانب اللى انتم مبهورين بيهم دول
فى اييييييييييييه

واللى يقولك
((اللي بيتعامل مع اجانب بيبقي صعب عليه اوي يرجع تاني يتعامل مع المصريين ))
صعب اوى الجمله دى يا خمسه فضفضه صعبه اوى اوى يعنى وخصوصا انك مصريهوممكن تكونى كمان عايشه فى مصر ودى تبقه مصيبه بالنسبالك

بجد اسف لو كان اسلوب حاد فى التعبير

خلص الكلام والسلام خير ختام

Jade said...

Gheiba taweela ya Mr. Daktara!
I hope you are well & see you are diong great in your job ahoh! Rabena ma3ak...
Yeah it is sad how foreigners are so much easier & better to deal with than Egyptians... Ya khosara we have lost 3ala ra2yak "mabade2 el roqeey" fel ta3amolat...
In all cases, enjoy Sharm ya me3alem & stay away from the Ukrainians & Russians ;)

Cheers!
J

daktara said...

Jade

realy i miss you sooooooooo much
i know, i did not visit u for aloooong time
but u know its ths work
i hope that u r o.k and every thing is in the right way in dubai.
up till now i'm away from russian and ukrain however very beatiful & attractive they are, but i'm close to english, deutsch and scandinafian, but not in the naughty way u think
keep visiting me

look around.
dr. khaled

Unknown said...

ايوه صح انت بتشتغل ايه
انت مش لسه خريج
وتقريبا نتيجتك مطلعتش زى حلاتنا
وعلى فكره
انا معاك انك تتعامل مع اجنبى اسهل عشان اللغه
لكن صدقنى التعامل مع ابن بلدك اجمل كتير لان فيه نوع من الحميميه مش عارفه قدرت تشعر بيها ولا لا

مروة الزارع said...

عارف انا بزعل اوى لما بلاقى حد بيقول التعامل مع الاجانب احسن

هو صحيح كدة

بس بزعل وبغير على بلدى

:(

daktara said...

لماضة
حلو قوي موضوع حميمية ده
لما تشتغلي وتحتكي بالناس هتحسي بيه قوي

مروة
الحقيقة وان كانت حقيقة وبتوجع بتفضل هي الحقيقة

الدبور said...

شرم الشيخ مرة واحده
ده انا مش عرفت اروح الا مرسي علم
فعلا الدنيا دي ارزاق
ومش معاك تصريح و هبلغ عنك شرطه السياحه ماهو قرايبي في الشغل وكلنا عيله في بعضينا
المهم احكيلي لما ترجع ايه الاخبار هناك و ظروف الشغل ولو عرفت يبقي علي الياهو نتكلم يبقي كويس

تحياتي

M A K I said...

ازيك يا دكترة
أنا عايزة أقول حاجة و عن تجربة
أنا احتكيت بأجانب كتير بحكم دراستى اللى هى الالسن و فعلا الأجانب راقيين جدا جدا
بس ده بيفكرنى بالتمثال الجميل الصموت اللى من غير روح
احنا أحسن صحيح احنا مشاكسين بس طيبين
و بعدين مش كل الأجانب
يعنى خد عندك مثلا الايطاليين
وهما على ما أعتقد ماليين شرم
دول بقى روشيين طحن و قريبيين لينا من حيث التصرفات و أحيانا الشكل
بس نقول ايه بقى فى عقدة الخواجة
احنا ليه ثقتنا ف أنفسنا معدومة للدرجة دى

Layla said...

هههه...اتفق معاك في الحكاية دي

المشكلة في الثقافة اللي ممكن تتقبل الكلام والتعليمات وتنفذها..المشكلة في الدماااغ

Vague said...

هييييييييييه

واحد اسمعلاوي

smraa alnil said...

انا اتفق معاك تماما

والغرب مش زي ما احنا بنقول بالعكس دول ناس عندهم مبادئ

ومستنين البوست اللي فيه اسوء موقف

Unknown said...

hii,nice blog guys.lets make blogroll with me :
http://gallerycelebrities.blogspot.com/

José Faria said...

Saúde e progressos sociais em qualquer parte do mundo!
Abraços

Anonymous said...

معلش يعنى عندى سؤال زى كتير غيرى انت بتشتغل ايه هناك مااحنا كلنا يدوب لسه مخلصين والنتيجه ظهره ومستنيين الامتياز صحيح بننزل تدريب على مالامتياز يبدا بس ياريت لو نعرف لانى ملاحظه انك مخلص ونتيجتك ظهرت قبلنا بفتره

مورا.....

جسر الى الحياة said...

كل بلد فيها طبقات من الناس وطبيعى ان ناس جايين سياحة تجدهم راقيين فى التعامل لكن مننكرش انهم عمليين جدا عشان كده بيحافظوا على اى نظام سواء فى صحتهم او مواعيدهم عاملين زى قطر السكة الحديد بمعنى الكلمة لكن مفيش عندهم لا جدعنة المصريين ولا حميميتهم رغمانى معاك انهم شديدى النظام واحنا معظمنا شديدى الفوضوية الا ان روحنا اجمل منهم مليون مرة وتقبل رايى.. مش عارفة ليه حاسة انك هتبقى من الدكاترة اياهم اللى هيعالجوا كريمة المجتمع
تقبل رايى بدون زعل وتحياتى

Anonymous said...

اقتباس:لكن مفيش عندهم لا جدعنة المصريين
هو الاخ مش من هنا ولا ايه؟ جدعنة هاجرت ليبيا من تلاتين سنة وسابت اختها ندالة بس لوحدها هنا

Anonymous said...

السلام عليكم يا دكتور خالد
يا ريت تتصل بيا ضروري على الميل ده عشان عايزك في حاجة مهمة
أنا اسمي مؤمن و زميل ليك بس من طب عين شمس
الميل بتاعي أهو
moamenf@hotmail.com