Monday, February 23, 2009

ظهور نتيجة التكليف .... شرم الشيخ مرحبا


ظهرت بالأمس نتيجة تكليف الاطباء دفعة ديسمبر 2007 واللي هيتكلفوا في اول مارس 2009

وانا طبعا منهم

النتيجة تعتبر كارثية لأغلب الناس اللي اعرفهم

تقريبا انا واصحابي غطينا معظم انحاء الجمهورية

انا جالي تكليفي في شرم الشيخ

الحمد لله احسن من ناس تانية كتير علي الاقل انا كنت كاتبها الرغبة الرابعة

وبغض النظر عن اني اشتغلت هناك قبل كده


انا مش زعلان بس كمان مش فرحان قوي بشرم الشيخ

صحيح انا اشتغلت هناك وعندي خبره بيها وخلال السنة اللي فاتت (سنة الامتياز) فكرت كذا مرة بل كمان سعيت اني ارجع اشتغل هناك تاني , لكن دلوقتي الوضع اختلف

اولا انا من ساعة ما خلصت امتحانات في نوفمبر 2007 وانا بره البيت

اشتغلت شهرين في الغردقة وشهرين في شرم الشيخ

وبعدين قضيت ستة شهور امتياز في القاهرة

يدوبك ريحت شهر رمضان في البيت (الاسماعيلية) وبعدين بدأت كورس

medical transcription.

في القاهرة تاني لمده اربهة شهور

وبرضه اثناء الكورس قدمت وباستعد وربنا يوفقني وبدعواتكم لأمتحان الملحقيين الدبلوماسيين في وزارة الخارجية

يعني عندي من اول مارس التكليف في شرم الشيخ , والكورس في القاهرة , وامتحان وزارة الخارجية في نص تلاتة

ومكلمني دكتور جاري علشان اشاركه العيادة معاه اشيل نص الاسبوع وهو النص التاني

ده كله غير ان انا زهقت من الغربة والسفر وكنت ناوي اقضي السنة اللي قبل الجيش دي( تكليفي يعني) في مكان قريب من البيت

لكن الحمد لله علي كل شئ

شرم حلوة برضه واحسن من ناس اصحابي كتير

اللي راح بير العبد , ابوذنيمة , الطور , اسوان , رفح , سفاجا , نخل وغيرها كتيييييير





شكلها باظت

انظر حولك

د. خالد عزب

24 comments:

فشكووول said...

ايوه يا عم الدكتور .. حتبقى من المقيمين فى شرم بلد كبير الكبراء وحتبقى جاره ويمكن يستدعوك مره عشان تعالجه .. بس نصيحه ابقى عالجه بدون ضمير عشان ربنا يخلصنا منه
الف مبروك وربنا يوفقك فى امتحان الخارجيه
تحياتى

*البت المشمشية *حلوة بس شقية * said...

مش هقور
ماشية معاك حلاوة شرم مرة واحدة

ربنا يوفقك

daktara said...

fashkool
انا هعمل اللي انت بتقول عليه
بس هبلغ عنك ان انت العقل المدبر والممول كمان

مشمشاية
ايه , تحبي تيجي معايا

شكلها باظط
انظر حولك
د. خالد عزب

Ola said...

لي بالك يا دكترة!! انت فاكر نفسك حتشتغل في مستشفى مصر الدولي؟؟ ده تكليف!! يعني وحدة صحية في وسط الرملة و سماهة أي كلام و جهاز ضغط بايظ:) Have a nice time:)

ahmed_k said...

أولا ربنا يوفقك في أختبار وزارة الخارجيه
وبعدين الغربه دي متعة الحياه علشان تعرف حلاوة بلدنا لازم تلفها ويبقالك ذكريات هنا وهناك وشرم مش غربه اوي دي كلها 3 ساعت من اسماعيليه
يعني انت في مصر برضو مطلعتش بره
وأهي فتره بسيطه وكلها أيام ونقولك حتوحشنا يا دفعه ههههه

عاشقه الرومانسيه said...

طيب احمد ربنا انك احسن من غيرك
وجاى الصيف بلبط الصبح واشتغل بالليل
اوعدنا يارب
والحمد لله انى مش دكتوره
هههههههههههههههه

رئيس التحرير said...

بسم الله الرحمن الرحيم
Daktara
السلام عليكم ورحمه الله وبركاته
*ربنا يوفقك في امتحان الخارجيه ويبعد عنك الداخليه
*شرم لذيذه ولذيذه أويييي
*بخصوص موضوع الصوره لو تأملتها راح تعرف العلاقه،دا انت ابو الصور
*وعلي فكره مش انت بس الي مش فاهم كمان انا مش فاهم ممكن تفهمني ...شكلها باظت
دمت عزيزي ...دكتور من حق سنتي بتوجعني!

د. ياسر عمر عبد الفتاح said...

والله العظيم صعبت عليا
بس الحال من بعضه يعنى
أخوك صيدلى
ولما ربنا يكرمنى بإفراج مبكر بعد خمس أضعاف المدة وأتخرج (قول يا رب)
ممكن على تقديرى الرهيب وترتيبى الغير عادى أتكلف على حدود ليبيا

بصفتك راجل لفيت مصر كلها
هيه حدود ليبيا أحسن ولا حلايب ؟؟؟

Anonymous said...

انا بقه بقالي سنتين في اسوان
اقوللك اه في فلوس private و 500% بس الذل وبهدلة الدكتور بتاع الريف والدرجه الماليه اللي من المستحيلات اللي انت تنقلها وترجع بلدك

Unknown said...

اشطة........ربنا معاك يا دكتور

صفــــاء said...

.
الف مبرووك يا دكتور

وشرم الشيخ تزعل حد ؟

وهتبقى زى ما قال عمنا فشكول مجاور الاكابر ومن جاور السعيد يسعد
.

daktara said...

يا جماعة اشكركم كلكم
لكن انا زي ما قلت قبل كده وصرحت في جميع وسائل الاعلام
انا مش زعلان وفي نفس الوقت مش فرحان قوي بشرم الشيخ
خاصة ان انا مجربها قبل كده
هي بلد حلوة لو هتقضي اسبوع ولا اتنين اجازة
اما انها تكون مكان شغل فدمها تقيل
وبعدين ربنا يستر واروح مكان كويس هناك
لأن هناك فعلا ياما تكون في مكان كويس وتتظبط
ياما هتكون بعته في قلب الصحراء
ربنا يستر

شكلها باظط
انظر حولك
د. خالد عزب

daktara said...

ola
ربنا يطمنك

daktara said...

ahmed-k
شكرا علي ذوقك
علي فكره شرم الشيخ 6 ساعات من الاسماعيلية مش 3

daktara said...

عاشقة الرومانسية
ايه ؟
تحبي تيجي تبلبطي معايا

daktara said...

رئيس التحرير
اشكرك علي امنيتك
ياسيدي تنور وتشرف في شرم الشيخ

daktara said...

ياسر عبد الفتاح
طيب ما تسيبك من ليبيا وحلايب
وتروح رفح فعلا احسن

daktara said...

Anonymous

هي دي بقي المشكلة الحقيقية

daktara said...

انجي وصفاء
الدعوة مفتوحة لكم تنوروني في شرم الشيخ
ولا اقولكن
ماتروحوا انتن تشتغلوا مكاني

Anonymous said...
This comment has been removed by a blog administrator.
Anonymous said...
This comment has been removed by a blog administrator.
منــار فايد said...

ربنا يوفقك طبعا يارب
انت بقى تخصصك ايه بالظبط

ياريت يادكتور تزور مدونتي عشان عايزه منك شويه استفسارات بجد

انا ببقى في الاجازه مش لاقيه حاجه اعملها وببقى عايزه اخد كورسات بس ببقى مش عارفه اخد ايه؟

ياريت تفيدني انا في سنه خامسه وفي الاجازه اخر السنه ان شاء الله مفروض اخد ايه عشان اقدر استفيد من الاجازه لان بصراحه الاجازات اللي فاتت انا ماعملتش بيها اي حاجه كنت بسافر السعوديه واقضي الاجازه هناك

ياريت تقدر تفيدني وترد عندي في المدونه بتاعتي لو سمحت عشان مايتوهشي الرد

daktara said...

jn

dramrsamir1 said...

اهلا وسهلا يا دكتره ربنا يوفقك شرم الشيخ م ش وحشه
انا كدتور امتايز وعايز اشتغل في شرن لو في شغل ابعتلي علي الايميل dramrsamir1@yahoo.com