Friday, February 02, 2007

نداء الي جميع المدونين


في حاجات بالاقيها في المدونات الصراحة كده بتخنقني
علشان كده دي نصيحة لكل صاحب مدونة انه يحاول تجنب الاشياء دي في مدونته
اولا اللي بيخلي التعليقات في صفحة جديدة مستقلة, حاجة ملهاش لازمة خالص بتكتر عدد الصفحات اللي انا فاتحها علي الفاضي وبتبقي تقيلة جدا جدا وبتجبرني اقفل المدونة الاصل دون قراءة باقي الموضوعات
ثانيا البني ادم اللي بيخلي التعليقات
Comment moderation has been enabled. All comments must be approved by the blog author.
بصراحة حاجة تخنق لأن انا بحب اقرأ تعليقي بعد ما يتنشر وخاصة علشان اتأكد انه مفيهوش اخطاء املائية , واذا كان عامل رقابه في مدونته ويسمح للتعليقات اللي علي مزاجه بس فده يروح يتنيل احسن
ثالثا ودي بجد بتخنق اهلي , البني ادم اللي بيحط كلمة تأكيد
Word Verification
اهو ده بقي تعريف البني ادم الخنيق حرفيا , لأنها ملهاش اي لازمة في الحياة وببتضيع وقت ويا سلام بقي بعد ما انقلها بخطها المعفن ترجع تقولي غلط , بقفل المدونة علطول واقول انشالله ما علقت
رابعا واخر حاجة حاليا هي المدونات اللي بتحتاج كتابة عريضة تعريفات قبل التعليق زي الاسم والايميل وعنوان المدونة بيحسسني اني داخل الحرب وبتبقي ممله ورخمه

دي بعض الحاجات اللي بتضايقني في بعض المدونات خاصة اثناء التعليق , وانا كنت ناوي اكتب الموضوع ده واحط بعض الامثلة للمدونين في كل نقطة لكن قلت الطيب احسن وكل واحد عارف نفسه واللي في مدونته بطحة يحس بيها

14 comments:

ALiaa said...

أول واحدة حلوة انك بتقرا الموضوع بعيجا عن التعليقات... بالعكس دي حلوة جدا.... الاتنين التانيين دول رزلين بجد

كلام لوجيك said...

انت كده جيبت الخلاصة
هو ده التساؤل اللى كان محير كتير مننا
ليه موضوع كلمة التأكيد والحاجات العقيمة اللى بتخنق الواحد

من ناحية تانية ليه حذف بعض التعليقات وعمل الفلترة للكلام اللى مايعجبش
لازم يكون فيه تقبل للرأي والرأي الاخر

انا متفق معاك جدا جدا

لكن نقطة التعليقات ووضعها فى صفحة تانية فالموضوع ده يرجع لصاحب المدونة
يارب حبايبنا البلوجرز ينتبهوا لمثل هذه النقاط التى قد تجلب الملل والضيق
وشكرا يا دكترة

... said...

لفت انتباهى انك عملت بوست مخصوص للتعليق على الحكاية دى
والظاهر انها بتزعج فعلا
لكن يمكن علشان انا صبورة شوية باستحمل
ولما باحب اكتب تعليق بافضل وراه لما يتكتب
تسعين فى المية باكافح وباحاول

رغم انك مش بتعلق عندى
بس عايزة اقوللك ان مسألة الصفحة التانية بتبقى نتيجة للتامبلت الجديدة اللى اختارها المدون من موقع اخر غير بلوجر، انا عملت كدة وفوجئت ان التصميم مصمم على كدة
:)
يعنى غالبا مش ممكن تتلغى
الا فى حالة لو كانت من تامبلت بلوجر والمدون بنفسه قال ان التعليق يبقى مش فى بوب اب ويندو

طول بااااالك
خلى نفسك طويل
شكلك دايل اب او زى حالاتى مشترك فى وصلة مع سبعميت بنى آدم

انت افتح الصفحة واخرج وتعالى فى السهرة علّق
عاااادى جدا

علا من غزة said...



الحمد لله ماعنديش ولا حاجة من الاعراض دي في مدونتي

في حاجات فعلا بتحس انك داخل تحقيق مش تعليق

تشكرات على التنبيه يا فندم

:)

تحياتي من غزة

قاسم أفندي said...

كنت متوقع اني أجي أعلق الاقيك عامل حاجه من الحاجات الخنيقة دي :)
بس بوست لذيذ والله فكرني باللي خلقه ضيق راح يفصل بدلة عند الترزي قاله انا عايزك تعملهالي صفين مش صف واحد ونيلة وبلا ازرق وبعدين الزراير عايزها من القماش مش النحاس والزفت اللي بيلمع ده .. أقولك والله مانت عامل حاجه ... هاااااااات

محمد عبد الغفار said...

أنا ينطبق على ثانياً ورايح اتنيل

عاوز بس اقلك انى عامل الحكايه لسبب أخر غير اللى انت ذكرته الا وهو منع التعليقات الخارجه عن حدود الليقاه والأدب اى شئ غير كده بنشره وهنشره وتعالى عندى شوف التعليقات اللى بتهاجمنى جنب اللى بتشجعنى انما قلة ادب لا والف لا

tota said...

دكترة
قلبك ابيض يا دكتور الطيب احسن

يعنى فى كتير مدونين لكن مش محترفين يا دكتور لسه هواة

هى بصراحة كمان بتغظنى انا كمان

اه والله
تحياتى

MAKSOFA said...

بص بقي

انا عن نفسي
بعد ماقريت البوست بتاعك غيرت حكايه التعليق في بوكس

اما حكايه تحويل التعليق دي
موش حا اقدر اوعدك بتغيرها
ليه لأني باعاني من بعض القراء اللي مابيقروش صح ولا بيفهموش صح

فالشتائم التي تنهال
كثيره وكبيره ومن العيار الثقيل لذلك امرر التعليقات التي تنتقدني او حتي تسبني بشتائم من الممكن نشرها اما الشتائم المتداوله في الشوارع لايمكن ان انشرها في مدونتي

تحياتي لك
وتعالي اقرا وعلق ومعلش بقي سماح انت عرفت قصدي

sherehan84 said...

عندك حق في كل كلمه قلتها
أنا كمان بتفقع جدا من الحاجات دي

daktara said...

انا مكنتش اعرف ان الموضوع هيلاقي الاستجابه دي كلها
والحمد لله اتفق معظم الناس معايا
باستثناء موضوع التعليق في صفحة جديدة
انا زجهة نظري انه بيتقل النت جدا
خاصة لاصحاب الدايل اب زي حالاتي

daktara said...

حلم
صحيح انا نادرا ما علقت عندك
لكني عارفك جدا وباحترمك جدا من تعليقاتك عند باقي المدونيين واعرف انك صاحبة قلم جيد وموهبة كبيرة خاصة في النقد الادبي ولا انسي تعليقاتك علي قصص احمد شقير
فلك تحياتي

Anonymous said...

انا عاملة حكاية النافدة المستقلة دي لكن مكنتش افنكر انها بتزعج حد
انا اللي بيزعجني حقيقي الموسيقى اللي بيحطوها تيجي على الموسيقى اللي انا بكون بسمعها و تلخبط الدنيا عشان كده بقيت اقفل المايك وانا داخلة على مدونة
تحياتي

Memo said...

i support dah bkol ma amlok men kowaaaaaaaaaaaaaa

كلبوزة لكن سمباتيك said...

ههههههه معلش يا دكاترة بس اصل ليها اصل
انا شخصيا واحد سافل يبعتلي تعليقات ابيحة و لازم امسحها اول باول و صدقني انا بنشر التعليقات اول باول

فعملية فلترة التعليقات دي مش ارننة بس شر لابد منه
يا سيدي اي خطأ املائي مقبول منك

تحياتي